Te Whakaaturanga 1
Te Kai a Te Rangatira – Ka whakaritea te whare hei wharekai.
Waka Huia – Ka kōrero a Kīngi Ihaka rāua ko Taipari Munroe mō te kiore māori.
Te Whakaaturanga 2
Te Kai a Te Rangatira – Ka peita a Tū i tētahi pikitia i runga i te pakitara.
Waka Huia – Ka kōrero a Sonny rāua ko Mona Riini mō ngā tākaro Māori i ngā wā o mua.
Te Whakaaturanga 3
Te Kai a Te Rangatira – Ka whakareri rātou ki te whakatuwheratanga o te wharekai, ā, ka whakaoti a Tū i tana pikitia.
Waka Huia – He kōrero mō Rangimārie Hetet.
Te Whakaaturanga 4
Te Kai a Te Rangatira – Ko te pō tuatahi o te wharekai, o Te Kai a Te Rangatira.
Waka Huia – He kōrero nā Turi Elkington mō te moutere o Rangitoto ki te Tonga.
Te Whakaaturanga 5
Te Kai a Te Rangatira – Ka tae mai te kaituhi mō ngā nūpepa ki Te Kai a Te Rangatira, ā, ka kitea e Mangu ko wai ngā tāhae e whānako ana i ngā kai.
Waka Huia – He whakaaro nā Menu Hibbs mō te tuhituhi.
Te Whakaaturanga 6
Te Kai a Te Rangatira – Ka tae mai te hoa o Mangu ki te wharekai.
Waka Huia – Ka kōrero a Moari Stafford mō Te Karere.
Te Whakaaturanga 7
Te Kai a Te Rangatira – Ka whakareri a Hāriata rātou ko Hine, ko Anarei mā ki te whakanui i te rā o te Kirihimete.
Waka Huia – Ka kōrero a Bernard Makoare mō ngā taonga pūoro.
Te Whakaaturanga 8
Te Kai a Te Rangatira – Ka haria mai te punua poaka, ā, ka tae mai hoki a Hana Koko.
Waka Huia – He kōrero nā Rāpata Emery rāua ko Tāne Taylor mō te maramataka.
Te Whakaaturanga 9
Te Kai a Te Rangatira – Ka tono a Mangu ki a Tahi kia tū te pō a Te Kōhanga Reo ki Te Kai a Te Rangatira, ā, ka whakaaetia e Tahi.
Waka Huia –He kōrero nā Morven Simon mō ngā painga o te awa o Whanganui ki ngā hapū e noho ana i ngā tahataha o taua awa.
Te Whakaaturanga 10
Te Kai a Te Rangatira – Ka tū te pō a Te Kōhanga Reo ki Te Kai a Te Rangatira.
Waka Huia – He pōwhiri i te Tai Tokerau mō Winitana Pita mā.
Te Whakaaturanga 11
Te Kai a Te Rangatira – He raruraru kei waenganui i a Raiha rāua ko Mākuīni.
Waka Huia – Ka kōrero a Ned Waititi o Te Whānau-a-Apanui mō Pou rāua ko Rehua me ngā tikanga mō te hī moki.
Te Whakaaturanga 12
Te Kai a Te Rangatira – Ka kōrero a Tū ki a Tahi mō tōna pūhaehae ki a Hine, ā, ka tae mai a Henare Te Moranui ki te tiki mai i te umu, nā te mea kāore te nama i utua e Hāriata. Ka tau te rangimārie i waenganui i a Raiha rāua ko Mākuīni.
Waka Huia – Ka kōrero a Rāpata Emery mō ngā atua Māori.
Te Whakaaturanga 13
Te Kai a Te Rangatira – Kei te hiahia tonu a Anarei ki te hoko i te wharekai, ā, he hākari mō te huritau o Hāriata.
Waka Huia – Ka kōrero a Erana Wineti mō te haere ki tāwāhi.
He whakamārama
Kua mahia ngā whakaaturanga o tēnei hōtaka mā ngā ākonga e āhua mōhio kē ki te reo hei whakapakari i ngā pūkenga whakarongo. Kei te wharekai o tētahi whānau te horopaki o ngā wāhanga o te pūrākau, ā, he reo ōpaki anō hoki te āhua o te reo. E hāngai ana ngā kōrero me ngā whakamārama ki te pukapuka matua, ki te pukapuka tātaki, ki ngā kōpae me ngā rokiroki o Te Whanake 2 Te Pihinga. Ka whai hua te mātakitaki i ngā wāhanga o te pūrākau mehemea kua oti kē te nuinga o ngā mahi me ngā kōrero o aua rauemi. He kōrero anō i roto i te reo Māori kei ia whakaaturanga mō ētahi tikanga Māori.
Ka tūtaki koe i te whānau ki ia wāhanga o te pūrākau:
- Ko Tahi te kaumātua o te whānau. E 65 ōna tau.
- Ko Hāriata te tamāhine a Tahi. E 32 ōna tau.
- Ko Mākuīni te tuahine o Tahi. E 58 ōna tau. Kua mate tana tama, te tāne a Raiha.
- Nō Tūhoe a Raiha, ā, ko ia te hunaonga o Mākuīni.
- E 40 ngā tau o Mangu. Ko ia te kuki o te wharekai. Kua wehe rāua ko tana wahine, ā, he māhanga āna. Nō Ngāti Porou ia.
- E 30 te pakeke o Anarei. He kaikaute ia. Ko te moni tana rangatira. E hiahia ana rāua ko Mākuīni kia hokona te whare kua riro i te whānau. Kei te aroha atu ia ki a Hāriata.
- Ko Hine te tamāhine a Raiha. Tekau mā whitu tana pakeke. He akonga ia i te whare wānanga.
- E rua ngā tau o Tū e noho ana i ngā tiriti. Tekau mā waru ōna tau.
