Te Kākano
Kua mahia ngā whakaaturanga o tēnei hōtaka mā ngā ākonga kātahi anō ka tīmata ki te ako i te reo hei whakapakari i ngā pūkenga whakarongo. Kei te tāone te horopaki o ngā wāhanga o te pūrākau, ā, he reo ōpaki te āhua o te reo. E hāngai ana ngā kōrero me ngā whakamārama ki te pukapuka matua, ki te pukapuka tātaki, ki ngā kōpae me ngā rokiroki o Te Whanake 1 Te Kākano. Ka whai hua te mātakitaki i ngā wāhanga o te pūrākau mehemea kua mōhio kē te akonga ki ētahi āhuatanga o te reo Māori. He kōrero anō kei ia whakaaturanga mō ētahi āhuatanga o te reo me ētahi tikanga Māori.
Te Kai a Te Rangatira
Kua mahia ngā whakaaturanga o tēnei hōtaka mā ngā ākonga e āhua mōhio kē ki te reo hei whakapakari i ngā pūkenga whakarongo. Kei te wharekai o tētahi whānau te horopaki o ngā wāhanga o te pūrākau, ā, he reo ōpaki anō hoki te āhua o te reo. E hāngai ana ngā kōrero me ngā whakamārama ki te pukapuka matua, ki te pukapuka tātaki, ki ngā kōpae me ngā rokiroki o Te Whanake 2 Te Pihinga. Ka whai hua te mātakitaki i ngā wāhanga o te pūrākau mehemea kua oti kē te nuinga o ngā mahi me ngā kōrero o aua rauemi. He kōrero anō i roto i te reo Māori kei ia whakaaturanga mō ētahi tikanga Māori.
Ngā reo o te paetukutuku nei.
He ōrite tēnei paetukutuku ki ētahi atu o Te Whanake, arā ka taea te reo Māori, te reo Pākehā rānei te whiriwhiri hei reo mō ia whārangi. Ki te hiahiatia tētahi reo, me pāwhiri te kupu o te reo kei te kokonga o runga i te taha katau o ngā whārangi nei.
Kia mōhio mai, he hononga ki te papakupu kei runga o ngā whārangi nei. Mā tēnei ka tere te uru atu ki Te Aka, te papakupu kei te ipurangi tae atu hoki ki ngā kupu tohu ki ngā kaupapa me ngā whakamārama wetereo o ngā pukapuka o Te Whanake.
