Tēnā koe. Nau mai ki Te Whanake TV.
E rua ngā hōtaka kei tēnei paetukutuku. Tekau mā toru ngā whakaaturanga o ia hōtaka. Hei hoa ēnei mō ngā pukapuka me ngā rauemi o Te Whanake hei ako i te reo Māori. Tekau mā rua meneti pea te roa o ia wāhanga o te pūrākau o ngā hōtaka e rua. He whakamārama i ētahi āhuatanga o te reo me ngā tikanga te toenga o ia whakaaturanga, o ia whakaaturanga.
Ko Te Kākano te ingoa o te hōtaka tuatahi, ā, kua mahia mā ngā ākonga kātahi anō ka tīmata ki te ako i te reo hei whakapakari i ngā pūkenga whakarongo. Kei te tāone te horopaki o ngā wāhanga o te pūrākau, ā, he reo ōpaki te āhua o te reo. E hāngai ana ngā kōrero me ngā whakamārama ki te pukapuka matua, ki te pukapuka tātaki, ki ngā kōpae me ngā rokiroki o Te Whanake 1 Te Kākano. Ka whai hua te mātakitaki i ngā wāhanga o te pūrākau mehemea kua mōhio kē te akonga ki ētahi āhuatanga o te reo Māori.
Ko Te Kai a Te Rangatira te ingoa o te hōtaka tuarua, ā, kua mahia mā ngā ākonga e āhua mōhio kē ki te reo hei whakapakari i ngā pūkenga whakarongo. Kei te wharekai o tētahi whānau te horopaki o ngā wāhanga o te pūrākau, ā, he reo ōpaki anō hoki te āhua o te reo. E hāngai ana ngā kōrero me ngā whakamārama ki te pukapuka matua, ki te pukapuka tātaki, ki ngā kōpae me ngā rokiroki o Te Whanake 2 Te Pihinga. Ka whai hua te mātakitaki i ngā wāhanga o te pūrākau mehemea kua oti kē te nuinga o ngā mahi me ngā kōrero o aua rauemi.
Tērā pea kāore i te mārama te katoa o ngā kōrero o ngā pūrākau. Ki te kore e mārama ngā kōrero i te tīmatanga, kaua e āwangawanga. Me whakamātau kia mārama ai te matū o ngā kōrero, ā, mā ngā pikitia me tō mōhio haere ki ngā tāngata o te pūrākau ka puta mai te māramatanga. Kia rua, kia toru rānei ngā kitenga o ia wāhanga ka puta mai te māramatanga ki a koe.
He whakamārama
I hangaia kētia ēnei whakaaturanga mō ngā akoranga tauhōkai reo Māori o te whare wānanga. I hangaia hei kīnaki mō ngā rauemi o Te Whanake kia whakaaturia i te pouaka whakaata. Kua hangaia tēnei paetukutuku kore utu hei āwhina i ngā ākonga katoa o te reo Māori, he hua nō ēnei whakaaturanga hei whakapakari i ngā pūkenga whakarongo.
Kua tāpirihia ētahi mahi ki ia wāhanga o ngā pūrākau hei ārahi i a koe, ā, hei āwhina anō hoki kia puta mai he painga i te mātakitaki me te whakarongo ki ngā kōrerorero o ngā whakaaturanga.
Kia mataara! Neke atu i te tekau tau mai i te hanganga o ēnei whakaaturanga. Nō reira, kāore ētahi o ngā kōrero o ngā whakaaturanga mō ngā rauemi o Te Whanake e tika ana i nāianei. Tirohia te paetukutuku mō ngā rauemi o Te Whanake kia kite i ngā kōrero e tika ana ki tēnei wā.
